क्रिकेटप्रमाणे भारतीय फुटबॉललाही `मॅचफिक्सिंग’चे ग्रहण लागण्याची चिन्हे दिसत असून मलेशियातील बेटिंग टोळीने आय लीग फुटबॉल स्पर्धेतील सामने फिक्स करण्यासाठी भारतीय क्लबशी संपर्क साधण्याचा प्रयत्न केल्याचे एका वरिष्ठ पदाधिकाऱयाने मंगळवारी सांगितले. यामुळे भारतीय फुटबॉल फेडरेशनला भ्रष्टाचारविरोधी युनिट नेमण्यासाठी पाऊल उचलावे लागले आहे.
?
या संदर्भात सट्टेबाजांनी संपर्क साधण्याचा प्रयत्न केल्याचे गेल्या आठवडय़ात नवी दिल्लीत झालेल्या फिफा इंटरपोल इंटेग्रिटी इन स्पोर्ट्स कार्यशाळेवेळी काही क्लब्सनी सांगितले होते आणि अ. भा. फुटबॉल फेडरेशनचे उपाध्यक्ष सुब्रता दत्ता यांनी त्याबाबत तीव्र चिंता व्यक्त केली होती. `ही अत्यंत चिंताजनक बाब असल्यानेच फिफाने इंटरपोलला येथे पाठविले आणि मॅचफिक्सिंग, बेटिंग व इतर भ्रष्टाचार रोखण्यासाठी योजावयाच्या उपायांबाबत मार्गदर्शन करण्यासाठी बराच पैसा खर्च केला. फिफाने जर इतक्या गांभीर्याने त्याची दखल घेतली असेल तर ती निश्चितच चिंताजनक बाब आहे. एआयएफएफनेही त्याची गंभीर दखल घेतली आहे. भारतीय फेडरेशनने प्रामाणिक अधिकाऱयाच्या नेतृत्वाखालील भ्रष्टाचारविरोधी युनिट नियुक्त करण्याचा प्रस्ताव मी मांडला आहे. फेडरेशनची कार्यकारी समिती त्यावर चर्चा करून अंतिम निर्णय घेणार आहे. सर्व क्लब्सना असे प्रकार ओळखण्याचे, त्याला विरोध करण्याचे आणि त्याबाबत त्वरित माहिती देण्यास सांगण्यात आले आहे,’ असे दत्ता यांनी सांगितले. किती क्लब्सशी सट्टेबाजांनी संपर्क साधण्याचा प्रयत्न केला, त्यांची नावे सांगण्याचे त्यांनी टाळले.
गेल्या वर्षी मुंबई एफसीचे उपाध्यक्ष अतुल बग्दामिया यांना एका मलेशियन व्यक्तीकडून फोन आला होता. या क्लबने मलेशियात मित्रत्वाचे सामने खेळावेत आणि त्यांचा सर्व खर्च आपण करण्याचा प्रस्ताव त्याने बग्दामिया यांच्यासमोर ठेवला होता. त्यानंतर त्याने आय लीगमधील सामने फिक्स करण्याचा प्रस्तावही ठेवला होता. `हा प्रकार लक्षात आल्यावर त्यात मला रस नसल्याचे मी त्याला त्याचवेळी स्पष्टपणे सांगितले आणि फोन ठेवला. मला त्या व्यक्तीचे आता नावही आठवत नाही. पण तो मलेशियन होता,’ असे बग्दामिया यांनी वृत्तसंस्थेला सांगितले. एआयएफएफला त्याबाबत लगेचच का कळविले नाही, असे विचारता ते म्हणाले, त्यांची ऑफर मी फेटाळून लावल्याने हे प्रकरण तिथेच संपले असे मला वाटले. एआयएफएफने भ्रष्टाचारविरोधी पथकात जबाबदार अधिकारी नियुक्त करणार असल्याचे आम्हाला आता सांगण्यात आले आहे. असे प्रकार यापुढे घडल्यास या अधिकाऱयाला त्याबाबत माहिती द्यावी लागणार आहे. हे काम तसे सोपे झाले आहे. कारण कोणाशी संपर्क साधायचा हे प्रत्येकाला माहीत झालेय. कार्यशाळा झाल्यानंतर जागृती वाढली असल्याने यापुढचे काम सोपे झाले आहे,’ असे ते म्हणाले.
गेल्या महिन्यात मलेशियातील दुय्यम लीगमधील क्लबच्या पाच खेळाडूंवर व संघाच्या तीन पदाधिकाऱयांवर मॅचफिक्सिंगमध्ये दोषी आढळल्यानंतर आजीवन बंदीची कारवाई करण्यात आली आहे. आयपीएलमध्ये एस. श्रीशांतने स्पॉटफिक्सिंग केल्यानंतर बीसीसीआयने त्याच्यावर आजीवन बंदी घातली आहे.
No comments:
Post a Comment